Covid-19: Cwestiynau Cyffredin

Mae Llywodraeth Cymru wedi cyhoeddi o ddydd Llun 11 Hydref ymlaen y bydd yn ofynnol i bobl ddangos Pàs COVID y GIG i brofi eu bod naill ai wedi'u brechu'n llawn neu wedi cael Prawf Llif Unffordd negatif yn ddiweddar, er mwyn mynd i mewn i'r lleoliadau a'r digwyddiadau canlynol:

• digwyddiadau dan do heb seddi sy’n cynnwys mwy na 500 o bobl, lle mae pobl yn cymysgu'n agos am gyfnodau hir
• digwyddiadau awyr agored heb seddi sy’n cynnwys dros 4,000 o bobl yn cymysgu’n agos am gyfnodau hir
• clybiau nos
• unrhyw ddigwyddiad sydd â mwy na 10,000 o bobl yn bresennol

Gallwch gael eich Pàs COVID y GIG yma https://llyw.cymru/cael-eich-pas-covid-y-gig neu ffonio 0300 303 5667 i wneud cais am Bàs COVID os nad ydych yn gallu cael gafael yn ddigidol ar Bàs COVID y GIG.

Mae Cymru ar lefel rhybudd 0, mae rhagor o wybodaeth am lefel rhybudd 0 ar gael yma: https://llyw.cymru/lefel-rhybudd-0-crynodeb

Lefel rhybudd 0: 

• mae’n cael gwared â chyfyngiadau cyfreithiol ar nifer y bobl sy’n gallu cwrdd dan do, gan gynnwys mewn cartrefi preifat, mannau cyhoeddus neu mewn digwyddiadau
• gall pob busnes ac adeilad agor, gan gynnwys clybiau nos
• dylai pobl barhau i weithio gartref lle bynnag y bo modd
• bydd gorchuddion wyneb yn parhau i fod yn ofyniad cyfreithiol dan do, ac eithrio safleoedd lletygarwch. Bydd hyn yn cael ei adolygu’n gyson.

Mae rhagor o wybodaeth ac arweiniad gan Lywodraeth Cymru ar gael yma: https://llyw.cymru/cyfyngiadau-o-17-gorffennaf-cwestiynau-cyffredin 

Mae Iechyd Cyhoeddus Cymru wedi cyhoeddi gwybodaeth am frechlynnau COVID-19. Gallwch ddarllen y wybodaeth, gan gynnwys y cwestiynau cyffredin, yma.

Mae Iechyd Cyhoeddus Cymru yn dweud y dylai dos 1af brechlyn COVID-19 roi amddiffyniad da i chi rhag y coronafeirws o 3 neu 4 wythnos ar ôl i chi ei gael. Ond mae angen i chi gael y 2 ddos o’r brechlyn i roi amddiffyniad hirach i chi.

Mae’n bosibl i chi ddal neu ledaenu’r coronafeirws hyd yn oed ar ôl i chi gael eich brechu. Mae hyn yn golygu ei bod yn bwysig:

• dal ati i ddilyn y canllawiau cadw pellter cymdeithasol
• gwisgo masg wyneb a
• golchi eich dwylo’n rheolaidd

Mae rhagor o wybodaeth ar gael yma am y brechlyn - https://icc.gig.cymru/pynciau/imiwneiddio-a-brechlynnau/gwybodaeth-brechlyn-covid-19/ynglyn-ar-brechlyn/

Mae’r wybodaeth a’r canllawiau diweddaraf ar gael fan hyn:

Gwybodaeth wrth Lywodraeth Cymru

Gwybodaeth wrth Lywodraeth y DU

Gwybodaeth wrth Iechyd Cyhoeddus Cymru

Erthygl ddefnyddiol am lacio’r cyfyngiadau yng Nghymru gan wasanaeth ymchwil Senedd Cymru

Mae Prif Swyddog Meddygol Cymru wedi argymell o 1^af Ebrill ymlaen y dylai pobl sy’n eithriadol o agored i niwed yn glinigol ddilyn yr un cyngor â gweddill poblogaeth Cymru. I gael gwybod rhagor, dilynwch y ddolen at y datganiad ysgrifenedig: https://llyw.cymru/datganiad-ysgrifenedig-y-cyngor-ir-rheini-syn-eithriadol-o-agored-i-niwed-yn-glinigol-o-1-ebrill  

Mae’r wybodaeth a’r canllawiau diweddaraf ar ddiogelu pobl sy’n cael eu diffinio fel pobl sy’n eithriadol o agored i niwed yn feddygol (gwarchod) ar gael yma: https://llyw.cymru/canllawiau-ar-warchod-ac-amddiffyn-pobl-ddiffinnir-ar-sail-feddygol-fel-rhai-eithriadol-o-agored-i-html?_ga=2.217024214.1144442645.1608542588-1087656480.1543319269

Os ydych yn cael prawf positif am coronafeirws neu’n dangos symptomau, dylech hunanynysu am 10 diwrnod o leiaf, yn hytrach na saith.

Mae Prif Swyddogion Meddygol Cymru, yr Alban, Lloegr a Gogledd Iwerddon wedi cyhoeddi datganiad ar y cyd yn gwneud newidiadau i’r cyfnod hunanynysu o heddiw, 30 Gorffennaf 2020. Y cyfnod hunanynysu yw faint o amser y dylai unigolyn hunanynysu os oes ganddyn nhw symptomau Covid-19.

Y prif symptomau yw:

• tymheredd uchel: mae hyn yn golygu bod eich brest neu'ch cefn yn teimlo'n boeth i'w gyffwrdd (nid oes angen i chi fesur eich tymheredd)
• peswch newydd, parhaus: mae hyn yn golygu pesychu llawer am fwy nag awr, neu 3 neu fwy o byliau peswch mewn 24 awr (os oes gennych beswch fel arfer, gall fod yn waeth nag arfer)
• methu arogli neu flasu neu golli eich synnwyr o arogl neu flas: mae hyn yn golygu eich bod wedi sylwi nad ydych yn gallu arogli na blasu unrhyw beth, neu fod pethau'n arogli neu'n blasu'n wahanol i'r arfer

Os ydych yn datblygu un o’r symptomau hyn, dylech ddilyn y canllawiau hunanynysu a gwneud cais i gael prawf coronafeirws

Mae’r holiadur symptomau COVID-19 ar-lein (ar GIG 111 Cymru) yn gallu dweud wrthych os oes angen cymorth meddygol arnoch.

Mae Llywodraeth Cymru wedi diweddaru’r cyngor ar wisgo gorchuddion wyneb, felly yn ogystal â gorfod gwisgo gorchudd wyneb wrth deithio ar drafnidiaeth gyhoeddus yng Nghymru, bydd yn orfodol i bawb sy’n 11 oed neu’n hŷn wisgo gorchudd wyneb mewn siopau a mannau cyhoeddus dan do hefyd o ddydd Llun 14 Medi. Gallwch ddarllen y canllawiau llawn yma: https://llyw.cymru/gorchuddion-wyneb-canllawiau-ir-cyhoedd (yn cynnwys gwybodaeth i’r rheini nad ydynt yn gallu gwisgo gorchudd wyneb).

Mae gwybodaeth am sut i wneud gorchudd wyneb ar gael yma hefyd: https://llyw.cymru/sites/default/files/publications/2020-06/sut-i-wneud-gorchudd-wyneb-3-haen.pdf    

Os ydych yn hunanynysu a ddim yn gallu gadael eich cartref am eitemau bwyd hanfodol, ac nad oes gennych deulu na ffrindiau sy’n gallu rhoi cymorth i chi, dylech gysylltu â'ch awdurdod lleol. Gallwch ddod o hyd o fanylion cyswllt eich awdurdod lleol fan hyn . 

Os na allwch fforddio bwyd, efallai bydd eich banc bwyd lleol yn gallu helpu. Mae mwy o wybodaeth ar gael fan hyn.

Os ydych yn gwarchod (byddwch wedi derbyn llythyr oddi wrth Brif Swyddog Meddygol Cymru), mae cyngor am gyflenwadau bwyd ar gael fan hyn.

Mae nifer o’r archfarchnadoedd yn ceisio rhoi’r flaenoriaeth fwyaf i’r mwyaf bregus, a gallwch ffonio’r archfarchnad i weld sut i gael eich enw ar y rhestr flaenoriaeth.  Mae nifer o archfarchnadoedd hefyd yn cynnig amseroedd siopa penodol i bobl sy’n agored i niwed. Mwy o wybodaeth ar gael fan hyn.

Ceisiwch aros mewn cysylltiad â theulu, ffrindiau, cydweithwyr a chymdogion ar y ffôn, drwy’r post neu ar-lein. Helpwch eich gilydd. Rhowch wybod iddyn nhw os ydych yn teimlo’n anhwylus neu’n ynysig ac unig, neu angen unrhyw help i gael bwyd neu feddyginiaeth.

Mae eich cyngor gwirfoddol cymunedol lleol yn gweithio gyda gwirfoddolwyr i ddod o hyd i ffyrdd o gefnogi pobl hŷn a allai fod angen help, gyda siopa a chasglu meddyginiaeth, a chysylltu pobl â gwasanaethau cyfeillio. Gallwch ddod o hyd i fanylion cyswllt eich cyngor gwirfoddol cymunedol lleol fan hyn.

Gallwch hefyd gysylltu â gwasanaethau cyfeillio fel Silverline ar 0800 470 80 90, neu Wasanaeth cyfeillio newydd Age Cymru ar 08000 223 444. 

Mae Llywodraeth Cymru hefyd wedi lansio ymgyrch newydd ynglŷn â’r ffyrdd y gallwn gadw golwg a chefnogi ein gilydd. Gallwch ddarganfod mwy am yr ymgyrch Edrych ar ôl ein Gilydd yn Ddiogel fan hyn.

Mae amryw o brosiectau lleol ar waith, a byddwn yn diweddaru ein gwybodaeth am y rhain wrth iddyn nhw ddod ar gael.

Mae gwaith ar y gweill hefyd gyda Chartrefi Gofal i helpu preswylwyr i fynd ar-lein. Mae cyllid yn cael ei ddarparu i gyflenwi gofalwyr, cartrefi gofal a hosbisau â dyfeisiau digidol i'w galluogi i gael mynediad at wasanaethau ymgynghori fideo meddygol, gan gynnwys apwyntiadau meddygon teulu, a helpu pobl i gysylltu ag anwyliaid yn ystod cyfnod y cyfyngiadau.

Gallwch ddod o hyd i fwy o wybodaeth am y cymorth sydd ar gael i chi er mwyn cael pobl i fynd ar-lein o Cymunedau Digidol Cymru. Ffôn: 0300 111 5050.

Mae gwasanaethau cynghori ar gael i'ch helpu gydag amrywiaeth o faterion, dros y ffôn, e-bost neu drwy wefannau a gwe-sgwrs:

• Cyngor Cyffredinol: Age Cymru - Ffoniwch 08000 223 444 neu gallwch gael gwybod mwy fan hyn
• Byw’n annibynnol (gan gynnwys Cymhorthion, Addasiadau a Chynnal a Chadw Cartrefi): Gofal a Thrwsio - Ffoniwch  0300 111 333 neu gallwch gael gwybod mwy fan hyn 
• Cyngor am fudd-daliadau a chyflogaeth:  Cyngor ar Bopeth - Ffoniwch 03444 77 20 20
• Credyd Cynhwysol: Cyngor ar Bopeth - Ffoniwch  08000 241 220 (ffôn testun: 18001 08000 241 220)
• Cyngor am Ddyled: Step Change - Ffoniwch  0800 054 6734 neu gallwch gael gwybod mwy fan hyn
• Tai: Shelter Cymru – Ffoniwch  08000 495 495 neu gallwch gael gwybod mwy fan hyn
• Tai Cymdeithasol: Llywodraeth Cymru – a chanllawiau am gymorth i denantiaid  
• Budd-daliadau lles - Turn2Us – Defnyddiwch y ffurflen ar-lein i gysylltu ag ymgynghorydd a chael mynediad at wybodaeth am coronafeirws

Os ydych yn cael problemau ychwanegu arian at eich mesurydd (nwy neu drydan), ffoniwch eich cyflenwr ynni neu edrychwch ar y cyngor fan hyn. 

Mae Iechyd Cyhoeddus Cymru wedi cyhoeddi gwybodaeth am frechlynnau COVID-19. Gallwch ddarllen y wybodaeth, gan gynnwys y cwestiynau cyffredin, yma.

Mae Llywodraeth Cymru wedi cyhoeddi amrywiaeth eang o wybodaeth, gan gynnwys gwybodaeth i’r bobl sydd fwyaf agored i niwed:

Gwybodaeth am gadw pellter cymdeithasol

Gwybodaeth am warchod pobl eithriadol o agored i niwed

Mae gan Iechyd Cyhoeddus Cymru hefyd wybodaeth ynglŷn â sut gallwch ddiogelu eich iechyd a'ch lles.

Os ydych chi'n poeni y gallai fod gennych chi, neu anwylyd, symptomau Covid-19, ewch i Wiriwr Symptomau Galw Iechyd fan hyn

Bydd gan eich bwrdd iechyd hefyd amrywiaeth o wybodaeth ddefnyddiol ynglŷn â gofal iechyd a gwasanaethau lleol:

• Aneurin Bevan (yn cynnwys Blaenau Gwent, Caerffili, Sir Fynwy, Casnewydd, Torfaen a De Powys)
• Betsi Cadwaladr (yn cynnwys Ynys Môn, Gwynedd, Sir Ddinbych, Conwy, Sir y Fflint a Wrecsam)
• Cwm Taf Morgannwg (yn cynnwys Pen-y-bont ar Ogwr, Merthyr Tudful a Rhondda Cynon Taf)
• Caerdydd a’r Fro (yn cynnwys Caerdydd a’r Fro; hefyd yn gwasanaethu’r boblogaeth ehangach ar draws De a Chanolbarth Cymru ar gyfer ystod o arbenigeddau)
• Hywel Dda (yn cynnwys Sir Gaerfyrddin, Ceredigion a Sir Benfro)
• Powys (yn cynnwys Powys)
• Bae Abertawe (yn cynnwys Castell-nedd Port Talbot ac Abertawe)

Os oes angen i chi weld eich meddyg teulu, dylech eu ffonio a byddan nhw’n eich cynghori ar y trefniadau ar gyfer apwyntiadau, a all gynnwys apwyntiadau ffôn neu fideo.

Os byddwch yn trefnu apwyntiad i ymweld â'ch meddyg teulu, mae'n bosibl y bydd drws ffrynt y feddygfa ar glo, ond byddan nhw’n gadael i chi ddod i mewn os oes gennych apwyntiad.

Mae Llywodraeth Cymru wedi diweddaru’r canllawiau ar ymweld ag anwyliaid yn yr ysbyty.  

Dywed Llywodraeth Cymru mae Covid-19 yn dal i ledaenu yn ein cymunedau a rhaid atal ei ledaeniad mewn lleoliadau gofal iechyd er mwyn diogelu iechyd, diogelwch a lles cleifion/defnyddwyr gwasanaethau, staff ac ymwelwyr.  

Mae hyn yn golygu bod nifer yr ymwelwyr a ganiateir mewn lleoliadau gofal iechyd wedi'i gyfyngu ar hyn o bryd i sicrhau bod canllawiau ar fesurau cadw pellter cymdeithasol yn gallu cael eu parchu.

Yn y canllawiau ymweld, mae Llywodraeth Cymru yn nodi: 

• er mwyn sicrhau iechyd a diogelwch cleifion/defnyddwyr gwasanaeth a staff, ein blaenoriaeth gyntaf yw atal a rheoli heintiau mewn lleoliadau gofal iechyd
• er mwyn cydymffurfio â’r mesur cadw pellter cymdeithasol/corfforol o 2 fetr, mae dal angen cyfyngu ar nifer yr ymwelwyr
• dylid annog a chefnogi ymweliadau dros y we lle bo hynny’n bosib
• rhaid cytuno ar ymweliadau wyneb yn wyneb ymlaen llaw, a gellir cynnig ymweliadau awyr agored os yw hynny’n briodol
• dylai ymweliadau fod â phwrpas clir a chytundeb ar gyfer ymweld yn seiliedig ar les gorau’r claf/defnyddiwr gwasanaeth neu les yr ymwelydd. 

Gallwch ddarllen y canllawiau llawn fan hyn: https://llyw.cymru/ymweld-ag-ysbytai-yn-ystod-y-coronafeirws-canllawiau-html

Cyhoeddwyd canllawiau rhyddhau o’r ysbyty yng Nghymru ar 17 Rhagfyr. Mae’n nodi Gofynion Gwasanaeth Rhyddhau o’r Ysbyty ar gyfer iechyd, gofal cymdeithasol, partneriaid y trydydd sector ac annibynnol yng Nghymru, sy’n gorfod cadw at y canllawiau. 

Ar 13 Mawrth, cyhoeddodd y Gweinidog Iechyd a Gwasanaethau Cymdeithasol gyfarwyddeb i'r holl Fyrddau Iechyd i ohirio pob gwaith dewisol nad yw'n fater brys hyd y gellir rhagweld er mwyn galluogi ysbytai i baratoi ar gyfer y llwyth gwaith cynyddol a ddisgwylid.

Bydd yr holl gleifion y mae eu llawdriniaethau wedi'u gohirio yn cadw eu lle ar y rhestr aros a chysylltir â nhw unwaith y bydd y pandemig drosodd i drefnu dyddiad ac amser addas ar gyfer yr apwyntiad/llawdriniaeth. Yn ystod y cyfnod hwn, bydd byrddau iechyd yn ceisio sicrhau bod gweithdrefnau brys a gweithdrefnau canser yn parhau i ddigwydd.

Os ydych yn teimlo bod eich cyflwr wedi gwaethygu ac yn effeithio’n fwyfwy ar eich rwtîn bob dydd, efallai yr hoffech gysylltu â'ch meddyg teulu.

Dylai byrddau iechyd fod yn rhoi cyngor ar sut gall pobl reoli eu cyflyrau eu hunain a gall hefyd eich rhoi mewn cysylltiad ag adnoddau defnyddiol eraill, fel rhwydweithiau cymorth i gymheiriaid.

O ran ffisiotherapi, mae Cymdeithas Siartredig Ffisiotherapi wedi darparu adnoddau ar ei gwefan i helpu pobl i aros yn heini ac mae cleifion yn cael cyngor ysgrifenedig, dros y ffôn neu ar-lein i'w galluogi i reoli eu cyflwr eu hunain lle bo modd. Mewn achos o angen, bydd brysbennu dros y ffôn yn cael ei gynnal i sefydlu os oes angen ymyrraeth glinigol rithwir neu wyneb yn wyneb i leihau niwed hirdymor, hwyluso’r broses ryddhau neu osgoi derbyniadau.

Mae Carers UK wedi cyhoeddi canllawiau i ofalwyr di-dâl.

Mae Llywodraeth Cymru wedi cyhoeddi canllawiau ar gyfer ymwelwyr i gartrefi gofal. Gallwch eu darllen yma: https://gov.wales/sites/default/files/publications/2021-05/action-card-visitors-to-care-homes.pdf

Mae’r canllawiau ar gyfer darparwyr sy'n darparu gofal a chymorth i bobl sy'n byw / aros mewn cartrefi gofal (oedolion a phlant), lleoliadau byw â chymorth a gofal ychwanegol. Mae'r canllawiau yn helpu i ganiatáu i deulu, ffrindiau a gweithwyr proffesiynol ailgysylltu’n ddiogel â’r rheini sy’n byw mewn cartrefi gofal. Gallwch ddarllen y canllawiau fan hyn.

Os ydych yn datblygu unrhyw symptomau lle mae eich bywyd yn y fantol, dylech alw 999 ar unwaith. Gallan nhw gynnwys:

• Problemau anadlu difrifol (e.e. ddim yn gallu siarad fel arfer, troi’n las ac yn fyr o anadl)           
• Poen yn y frest (e.e. fel band tynn neu bwysau trwm yn y frest neu o’i hamgylch) 
• Strôc (e.e. methu â chodi braich, gwendid un ochr y corff neu wyneb wedi disgyn) 
• Anaf difrifol/gwaedu trwm na ellir ei atal 
• Yn ffitio nawr /yn anymwybodol (e.e. ni ellir ei ddeffro) 

Os oes gennych gwestiwn meddygol brys sy’n gysylltiedig â’ch cyflwr meddygol presennol neu am berson rydych chi'n gofalu amdano, cysylltwch â’ch practis meddyg teulu, neu eich tîm gofal ysbyty arbenigol. Lle bo modd, cewch gymorth dros y ffôn, neu ar-lein. Os yw eich meddyg yn penderfynu bod angen i chi gael eich gweld, bydd y GIG yn cysylltu â chi i drefnu sut i wneud hynny.

Os ydych yn poeni bod gennych chi, neu anwyliaid, symptomau posib Covid-19, ewch i Wiriwr Symptomau Galw Iechyd Cymru

Bydd y rheini sydd wedi’u nodi mewn risg uwch o salwch difrifol yn sgil y coronafeirws (oherwydd cyflwr iechyd difrifol sy’n bodoli’n barod) wedi derbyn llythyr wrth Brif Swyddog Meddygol Cymru.

Cafodd y cyflwr iechyd difrifol sy’n bodoli’n barod o fewn argymhelliad gwarchod Llywodraeth Cymru ei gytuno ar lefel y DU yn seiliedig ar gyngor clinigol arbenigol.

Os oes gennych gyflwr iechyd difrifol sy’n bodoli’n barod a’ch bod yn poeni, yna cysylltwch â’ch meddyg teulu. Gall meddygon teulu ddefnyddio eu harbenigedd i gynghori cleifion pellach i warchod, er mwyn sicrhau bod pob claf sydd â chyflyrau iechyd difrifol yn cael eu nodi, a'u bod bellach yn gallu anfon y llythyr o’r practis ac ychwanegu cleifion at y rhestr o unigolion risg uchel.

Rhaid gwneud penderfyniadau am opsiynau triniaeth fesul achos, gan ystyried y risgiau a’r buddion, a dymuniadau pobl eu hunain, trwy drafodaethau gonest rhwng cleifion, meddygon a theuluoedd.

Penderfyniad yr unigolyn yw cwblhau ffurflen DNA-CPR ai peidio, ac mae ganddyn nhw hawl i wneud y penderfyniad hwnnw heb deimlo o dan bwysau.

Gallwch ddarllen cyd-ddatganiad y Comisiynydd am DNA-CPR fan hyn.

Wrth ymateb i ddatganiad y Comisiynydd, ysgrifennodd y Prif Swyddog Meddygol a’r Prif Swyddog Nyrsio yng Nghymru lythyr yn ymateb i Brif Weithredwyr a chyfarwyddwyr y Byrddau Iechyd i’w wneud yn glir na ddylai ‘oedran, anabledd neu gyflwr hirdymor yn unig fyth fod yr unig reswm dros orchymyn DNACPR yn erbyn dymuniadau’r unigolyn’. Roedd y llythyr hefyd yn nodi ei fod ‘yn annerbyniol i gynlluniau gofal ymlaen llaw, gyda ffurflen DNACPR wedi’i chwblhau neu beidio, gael eu cymhwyso i grwpiau o bobl o unrhyw ddisgrifiad. Rhaid i’r penderfyniadau hyn barhau i gael eu gwneud ar sail yr unigolyn yn ôl angen a dymuniadau’r unigolyn’.

Gallwch ddarllen llythyr y Prif Swyddog Meddygol a’r Prif Swyddog Nyrsio fan hyn.

 

Ym mis Tachwedd 2019, cyhoeddodd y Comisiynydd ganllaw gwybodaeth mewn partneriaeth â Bwrdd Iechyd Prifysgol Aneurin Bevan sy'n anelu at helpu unigolion i gadw rheolaeth a pharhau i fod yn rhan o benderfyniadau a wneir am eu gofal. Gallwch lawrlwytho y Canllaw Cynllunio Gofal Ymlaen Llaw fan hyn.

Yn ogystal, sefydlodd Llywodraeth Cymru Grŵp Cynghori ar Faterion Moesol a Moesegol, sy’n cynnig cyngor moesegol i’r Llywodraeth mewn perthynas â materion sy’n cael eu hachosi neu eu heffeithio gan COVID-19. Mae Comisiynydd Pobl Hŷn Cymru yn aelod o’r grŵp, sydd wedi cyhoeddi fframwaith ar werthoedd ac egwyddorion moesegol ar gyfer darparu gofal iechyd. 

Os ydych yn wynebu cam-drin domestig, neu’n poeni am rywun rydych yn ei adnabod, mae help ar gael.

Cysylltwch â Hourglass Cymru (Action on Elder Abuse Cymru gynt) ar 0808 808 8141 neu ewch i wefan Hourglass.

Am gymorth y tu allan i oriau swyddfa, ffoniwch y llinell gymorth Byw heb Ofn 24 awr sy’n rhad ac am ddim ar 0808 8010 800. Gallwch hefyd gysylltu drwy neges destun - 07860 077 333 – neu e-bostio -info@livefearfreehelpline.wales – neu drwy sgwrs ar y we.

Mae Cynllun Dyn yn cynnig cymorth i ddynion Heterorywiol, Hoyw, Deurywiol a Traws sy’n wynebu cam-drin domestig gan bartner. Ffoniwch 0808 801 321 neu ewch i wefan Cynllun Dyn fan hyn.  

Mae llinell gymorth Bawso yn cynnig cymorth i ddioddefwyr a goroeswyr

BAME sydd wedi’u heffeithio gan bob math o drais yn erbyn menywod. Ffoniwch 0800 731 8147 neu ewch i wefan Bawso fan hyn.

Os oes angen cymorth arnoch ar frys, neu'n poeni bod rhywun mewn perygl ar hyn o bryd, galwch 999 ar unwaith a chysylltwch â’r heddlu. Os nad ydych yn gallu siarad, ffoniwch 999 a gwasgwch 5 5 pan ofynnir i chi a bydd help yn cael ei anfon i'ch lleoliad.

Nid yw eich hawliau o dan Ddeddf Cydraddoldeb 2010 yn cael eu heffeithio gan y Ddeddf Coronafeirws newydd.

Os ydych yn credu eich bod wedi dioddef gwahaniaethu, gallwch gysylltu â’r Gwasanaeth Ymgynghorol a Chymorth ar Gydraddoldeb (EASS) am gyngor a chymorth. Galwch 0808 800 0082 neu ewch i wefan EASS.

Mae Pwyllgor Menywod a Chydraddoldeb Senedd y DU yn chwilio am dystiolaeth bod pobl â nodweddion gwarchodedig yn cael eu heffeithio'n anghymesur gan Covid-19 ac ymateb y Llywodraeth, gan gynnwys y Ddeddf Coronafeirws frys. Gallwch gyflwyno eich tystiolaeth i’r Ymchwiliad fan hyn.

Mae’r Comisiynydd yn parhau i fonitro effaith y mesurau brys i sicrhau na wahaniaethir yn erbyn pobl hŷn ac mae wedi bod yn glir bod yn rhaid cynnal hawliau pobl hŷn wrth i ni symud ymlaen.

Nid yw eich hawliau o dan y Ddeddf Hawliau Dynol yn cael eu heffeithio gan y Ddeddf Coronafeirws newydd.

Os ydych yn credu bod eich hawliau dynol wedi'u torri, gallwch gysylltu â'r Gwasanaeth Ymgynghorol a Chymorth ar Gydraddoldeb (EASS) am gyngor a chymorth. Galwch 0808 800 0082 neu ewch i wefan  EASS.

Wrth ymateb i’r pandemig COVID-19, mae’r Llywodraeth wedi cyhoeddi mesurau sy’n anelu i ddiogelu hawl yr unigolyn i fyw (Erthygl 2 Siarter Hawliau Dynol Ewrop).

Er bod deddfwriaeth frys yn cael rhywfaint o effaith ar hawliau dynol, er enghraifft, yr hawl i ryddid (Erthygl 5 Siarter Hawliau Dynol Ewrop) a’r hawl i barchu bywyd teuluol (Erthygl 8 Siarter Hawliau Dynol Ewrop), rhaid ystyried bod yr effaith yn gymesur o hyd. Mae’r Comisiynydd yn monitro’r mater hwn i sicrhau bod hawliau dynol pobl hŷn yn cael eu cynnal.

Mae Pwyllgor Hawliau Dynol Senedd y DU yn archwilio gweithredoedd y Llywodraeth i sicrhau eu bod yn cydymffurfio â hawliau dynol. Gallwch gyflwyno tystiolaeth i’r Ymchwiliad fan hyn.  

Mae Llywodraeth Cymru wedi sefydlu Grŵp Cynghori ar Faterion Moesol a Moesegol i gynghori ar faterion yn ymwneud ag ystyriaethau moesol, moesegol, diwylliannol a ffydd. Mae aelodau hefyd yn darparu cyngor i wasanaethau iechyd i lywio rheolaeth deg a chyfiawn materion sy'n deillio o’r ymateb brys i ofal iechyd yn sgil pandemig Covid-19. Darllenwch fwy am y grŵp fan hyn.