All news
Astudiaeth Gwmpasu ar Wasanaethau Gwybodaeth a Chyngor i Bobl Hŷn yng Nghymru
Astudiaeth Gwmpasu ar Wasanaethau Gwybodaeth a Chyngor i Bobl Hŷn yng Nghymru (.pdf)
Diben yr astudiaeth hon yw nodi darlun eang y gwasanaethau gwybodaeth a chyngor i bobl hŷn yng Nghymru a bwydo gwaith y Comisiwn yn y maes hwn. Mae'n cymryd i ystyriaeth y gwerthoedd sy'n sail i swyddogaethau'r Comisiwn a gweithgareddau perthynol y Comisiwn a'i bartneriaid.
Mae'r astudiaeth yn adolygu‟r ymchwil gefndir sy'n ymwneud â gwasanaethau gwybodaeth a chyngor i bobl hŷn ac yn nodi safonau a modelau o arferion da wrth gynllunio a chyflwyno gwasanaethau i bobl hŷn. Mae'r astudiaeth yn canolbwyntio ar yr hyn y mae pobl hŷn yn ei ddisgwyl gan wasanaethau gwybodaeth a chyngor ac i ba raddau y mae'r gwasanaethau presennol yn diwallu eu gofynion, yn enwedig gofynion pobl hŷn sydd mewn perygl o gael niwed.
Mae'n ystyried effaith yr hinsawdd bolisi bresennol a'r hinsawdd ariannol bresennol ar ddatblygiadau a chynaliadwyedd mewn gwasanaethau gwybodaeth a chyngor. Mae'n ystyried y gwahanol ddulliau o gyflwyno a defnyddio technoleg gwybodaeth a chyfathrebu. Mae'n edrych ar wasanaethau o safbwynt daearyddiaeth, cydraddoldeb ac iaith.
Mae'r astudiaeth yn ymdrin â gwasanaethau gwybodaeth a chyngor ar draws ystod eang o feysydd polisi, gan roi sylw arbennig i wasanaethau gwybodaeth a chyngor integredig ac i gynhwysiant ariannol. Mae wedi'i chynnal drwy ddefnyddio ymchwil desg ac ymchwil ar y we a chyfweliadau strwythuredig gyda phobl hŷn, sefydliadau sy'n gweithio gyda phobl hŷn ac adrannau ac asiantaethau‟r llywodraeth.
